ਕਿੰਨਾ ਸੱਚ ਸੀ ਮੇਰਾ ਡਰ...!!
ਇੱਕ ਬਾਤ ਸੁਣਾਇਆ ਕਰਦੀ ਸੀ
ਜਿਸ ਵਿੱਚ ਜੰਗਲ ਦੇ ਵਿੱਚਕਾਰ
ਇੱਕ ਦਿਓ ਦਾ ਘਰ ਸੀ ,
ਉਸ ਘਰ ਜਦ ਬਾਤ ਦਾ ਨਾਇਕ ਜਾਂਦਾ ਸੀ
ਤਾਂ ਵਿਹੜੇ 'ਚ ਚਰਖਾ ਕੱਤਦੀ ਦਿਓ ਦੀ ਮਾਂ
ਨਾਇਕ ਰਾਜ ਕੁਮਾਰ ਨੂੰ ਵੇਖ ਕੇ
ਪਹਿਲਾਂ ਹੱਸਦੀ ਸੀ ਤੇ ਫੇਰ ਰੋਅ ਪੈਂਦੀ !
ਰਾਜ ਕੁਮਾਰ ਕਾਰਨ ਪੁੱਛਦਾ ਤਾਂ
ਦਿਓ ਦੀ ਮਾਂ ਕਹਿੰਦੀ ਕਿ -
ਮੈਂ ਹੱਸੀ ਤਾਂ ਇਸ ਲਈ ਹਾਂ
ਕਿ ਇੰਨੇ ਦਿਨ ਬਾਦ ਕੋਈ ਇਨਸਾਨ ਵੇਖਿਆ ਹੈ
ਤੇ ਰੋਈ ਇਸ ਲਈ ਹਾਂ
ਕਿ ਮੇਰਾ ਪੁੱਤ ਰਾਖਸ਼ ਹੈ
ਤੈਨੂੰ ਖਾ ਜਾਵੇਗਾ !
ਤੈਨੂੰ ਪਹਿਲੀ ਵਾਰ ਵੇਖ ਕੇ
ਮੇਰੀ ਹਾਲਤ ਵੀ ਦਿਓ ਦੀ ਮਾਂ ਵਾਲੀ ਹੀ ਹੋਈ ਸੀ ,
ਮੈਂ ਪਹਿਲਾਂ ਹੱਸਿਆ ਇਸ ਲਈ ਸਾਂ
ਕਿ ਤੂੰ ਮੈਂਨੂੰ ਮਿਲੀ ,
ਤੇ ਬਾਦ ਵਿੱਚ ਰੋਇਆ ਇਸ ਲਈ ਸਾਂ
ਕਿ ਜੱਗ ਰਾਖਸ਼ ਹੈ
ਤੈਨੂੰ ਖਾ ਜਾਵੇਗਾ....!
ਕਿੰਨਾ ਸੱਚ ਸੀ ਮੇਰਾ ਡਰ...!!
ਅਮਰਦੀਪ ਸਿੰਘ ਗਿੱਲ
No comments:
Post a Comment