ਅਮਰਜੀਤ ਢਿੱਲੋਂ

ਕਿਸ ਦਾ ਪੱਲੜਾ ਭਾਰਾ ਇਹਨਾਂ ਚੋਣਾਂ ਵਿੱਚ . . .
ਕਿਸ ਦਾ ਪੱਲੜਾ ਭਾਰਾ ਇਹਨਾਂ ਚੋਣਾਂ ਵਿੱਚ ਹੋਜੂ ਜਮਾਂ ਨਿਤਾਰਾ ਇਹਨਾਂ ਚੋਣਾਂ ਵਿੱਚ
ਬਾਦਲ ਆਖੇ ਮੈਂ ਹੀ ਸੀ.ਐਮ. ਫੇਰ ਬਣੂ, ਮੈਂ ਭਲਵਾਨ ਹਾਂ ਦਾਰਾ ਇਹਨਾਂ ਚੋਣਾਂ ਵਿੱਚ
ਅਮਰਿੰਦਰ ਦੀ ਅੱਖ ਬਾਦਲ ਦੀ ਕੁਰਸੀ 'ਤੇ, ਲਾਤਾ ਜ਼ੋਰ ਹੈ ਸਾਰਾ ਇਹਨਾਂ ਚੋਣਾਂ ਵਿੱਚ
ਮਨਪ੍ਰੀਤ ਬਾਦਲ ਨੇ ਅੱਡ ਹੋ ਲਾ ਦਿੱਤਾ, ਇਨਕਲਾਬ ਦਾ ਨਾਅਰਾ ਇਹਨਾਂ ਚੋਣਾਂ ਵਿੱਚ
ਮਾਇਆਵਤੀ ਮੁਕਤਸਰ ਆ ਕੇ ਲਾ ਗਈ ਹੈ, ਜੈ ਭੀਮ ਦਾ ਨਾਂਅਰਾ ਇਹਨਾਂ ਚੋਣਾਂ ਵਿੱਚ
ਲਾਲ ਝੰਡੇ ਵਾਲੇ ਵੀ ਮਨਪ੍ਰੀਤ ਦਾ ਲੈ ਕੇ ਫਿਰ ਉੱਠੇ ਨਵੇਂ ਸਹਾਰਾ ਇਹਨਾਂ ਚੋਣਾਂ ਵਿੱਚ
ਭੱਠਲ ਆਖੇ ਚੁੱਪ ਕਰ ਵੇ ਭਗਵੰਤ ਮਾਨ, ਕਰ ਨਾ ਦੇਈ ਕੋਈ ਕਾਰਾਂ ਇਹਨਾਂ ਚੋਣਾਂ ਵਿੱਚ
ਰਾਮੂਵਾਲੀਆ ਫੇਰ ਅਕਾਲੀ ਸਿੰਘ ਸਜ ਗਏ, ਹੋਇਆ ਪੰਥ ਪਿਆਰਾ ਇਹਨਾਂ ਚੋਣਾਂ ਵਿੱਚ
ਚੋਣ ਕਮਿਸ਼ਨ ਨੇ ਸਖਤੀ ਵਰਤੀ, ਫਿਰ ਹੋਇਆ ਵੋਟ ਵਿਕਣ ਵਰਤਾਰਾ ਇਹਨਾਂ ਚੋਣਾਂ ਵਿੱਚ
Ñਲੰਬੀ, ਗਿੱਦੜਬਾਹੇ ਹਲਕੇ ਦੇ ਵਿੱਚ ਵੋਟਰਾਂ ਦਾ ਮੁੱਲ ਪਿਆ ਹੈ ਭਾਰਾ ਇਹਨਾਂ ਚੋਣਾਂ ਵਿੱਚ
ਰਾਖਵੇਂ ਹਲਕੀ ਵੋਟਾਂ ਵਿਕਦੀਆਂ ਤੱਕਦਾ ਰਿਹਾ, ਤੰਤਰ ਲੋਕ ਵਿਚਾਰਾਂ ਇਹਨਾਂ ਚੋਣਾਂ ਵਿੱਚ
ਢਿੱਲੋਂ ਵੋਟਾਂ ਗਿਣਤੀ ਕਰਨ ਬਹਾਨੇ ਹੀ ਆ ਕੇ ਮਿਲ ਜਾ ਯਾਰਾਂ ਇਹਨਾਂ ਚੋਣਾਂ ਵਿੱਚ
ਚੋਣ ਕਮਿਸ਼ਨ ਨੇ
ਕੁਝ ਦਿਨ ਕਰ ਸਖਤਾਈ ਚੋਣ ਕਮਿਸ਼ਨ ਨੇ। ਸਭ ਦੀ ਨੀਂਦ ਉਡਾਈ ਚੋਣ ਕਮਿਸ਼ਨ ਨੇ।
ਪੈਸੇ ਵੰਡਣ ਵਾਲਿਆਂ ਨੂੰ ਨਹੀਂ ਬਖਸ਼ਾਂਗੇ, ਦਿੱਤੀ ਬੜੀ ਦੁਹਾਈ ਚੋਣ ਕਮਿਸ਼ਨ ਨੇ।
ਇੱਕ ਮਹੀਨਾ ਲੋਕਾਂ ਤੋਂ ਪੈਸੇ ਫੜ ਕੇ, ਕੀਤੀ ਬੜੀ ਕਮਾਈ ਚੋਣ ਕਮਿਸ਼ਨ ਨੇ।
ਜਦ ਜਿੱਤਣ ਦਾ ਵੇਲਾ ਨੇੜੇ ਆ ਪਹੁੰਚਾ, ਪਿੱਛੇ ਫੌਜ ਹਟਾਈ ਚੋਣ ਕਮਿਸ਼ਨ ਨੇ।
ਸ਼ਰੇਆਮ ਜਦ ਵੋਟਾਂ ਵਿਕਣ ਲੱਗੀਆਂ ਤਾਂ, ਪੂਰੇ ਢਿੱਲ ਵਰਤਾਈ ਚੋਣ ਕਮਿਸ਼ਨ ਨੇ।
ਲੰਬੀ, ਦੋਦੇ ਦੋ ਹਜ਼ਾਰ 'ਚ ਵੋਟ ਵਿੱਕੀ, ਰੱਖੀ ਬੜੀ ਸਮਾਈ ਚੋਣ ਕਮਿਸ਼ਨ ਨੇ।
ਇਹ ਵੀ ਕਿਸੇ ਇਸ਼ਾਰੇ 'ਤੇ ਨੱਚਦਾ ਹੈ, ਇਹੀਓ ਗੱਲ ਸਮਝਾਈ ਚੋਣ ਕਮਿਸ਼ਨ ਨੇ।
ਇਸ ਸਿਸਟਮ 'ਚੋਂ ਢਿੱਲੋਂ ਤੂੰ ਇਨਸਾਫ ਨਾ ਭਾਲ, ਚੋਰ ਮਸ਼ੇਰੇ ਭਾਈ, ਚੋਣ ਕਮਿਸ਼ਨ ਨੇ।

ਅਮਰਜੀਤ ਢਿੱਲੋਂ 94171-20427